مطبخ

مطبخ بوابة القاهرة يقدم.. طريقة عمل الكنافة بالقشطة الكدابة

الحلو على مائدة رمضان طبق رئيسي لا يمكن الاستغناء عنه، ولا يتم تجاهله، فتعمل الأم على إعداده لأسرتها لتعويض ما ينقصهم من سكريات خلال فترة الصيام، وتتفنن في تحضيره.

 

وتتصدر صينية الكنافة بالقشطة حلويات شهر رمضان الكريم، ولترشيد الاستهلاك، تقدم “بوابة القاهرة” طريقة عمل الكنافة بالقشطة الكدابة، حاجة خطيرة ومن الأخر، وطعمها ميتوصفش، وطريقتها مفيش أسهل منها.

 

مقادير الكنافة بالقشطة الكدابة

 

  • نص كيلو كنافو
  • ٢ معلقه كبيرة سكر بودر
  • كوباية سمنة سايحه

 

القشطه الكدابه

 

  • ٢ كوب لبن حليب
  • ٢ معلقة كبيرة نشأ
  • ٢ معلقة كبيرة سكر
  • ٢ معلقة كبيرة كريم شانتيه
  • معلقة صغيرة سمنه بلدي أو النوع اللي تفضليه

 

طريقة التحضير

 

أول خطوة بعملها القشطة الكدابة عشان تبرد، كوبيتين اللبن عليهم النشأ والسكر والشانتيه، ويتم تقليبهم على البارد، وبعدين حطيهم على النار وقلبى فيها لحد ما تتقل، ثم نزلي معلقة السمنة واتركيها على جنب تبرد.

 

هنجيب الكنافة وتكون متفرزه يعني طلعيها وافركيها بإيدك وفتفتيها خالص، ونزلي عليها السكر البودر والسمنة وقلبيها بحيث الكنافة كلها تتغلف بالسمنة السايحة.

 

هاتي صينية مقاس ٢٦ وادهنيها سمنة ونزلي نص كميه الكنافة واضغطيها جامد جدًا بإيدك، و صينية تانية مقاسها أصغر لازم يعني تكبسيها كويس، لحين ما تلاقي السمنه بتطلع بسيط على الوش، يبقى كده تمام.

 

نزلي الكريمة ومتفرديهاش على الكنافة كلها عشان متتحرقش من الجوانب وغطيها بباقي الكنافة، وبإيدك اضغطي عليها، وعلى درجة حرارة 180 وحطيها في الفرن نصف ساعة، لحين ما تلاقيها أحمرت من الجناب وخدت لون ذهبي، وبعدين شغلي الشوايه في الاّخر عشان تأخد لون حلو، وبعدين طلعيها واقلبيها واسقيها بالشربات، ويكون تقيل وبارد.

 

الشربات: 2 كوب سكر، عليهم كوب مايه، وقلبيهم على البارد ونزليهم على النار ومتقلبيش، وبعد ما يأخدو غلوه، هدي عليها النار، ولما يتقل الشربات اعصري نصف ليمونه مع معلقة فانيليا، ولمدة دقيقتين، ثم اطفي عليها. وبالهنا والشفاء.

 

كتبه-أسماء رمزي

موضوعات متعلقة

اترك رد

زر الذهاب إلى الأعلى