ثقافة

شكرًا قوي.. قصيدة للشاعر سامي النويهي

 

حاولت انقي من الجُمل أجمل حروف

عشان أزيح عنكوا الحَرَجْ وأمحي الكسوف

شكرًا قوي لكل واحد كان سبب

إني أدوس على الصعب واتحدى الظروف

الشكر واجب للي مني اتبرؤا

وقالولي حلمك يابني صعب تحقَّقُه

وحلفت ليهم حـ أبقى حاجه فــ يوم وأكون

وحلفوا عمري ما حـ أبقى حاجة وصدقوا

شكرًا لُكُم على غدرُكُم يأهل المروه

على كل طعنة اتسددت في القلب جوه

في وقت مانتوا بظُلمُكُم دايسين عليا

كانت كل ضربة منكُم بتزيدني قوة

ياللي حاولتوا تْوَقَفوا في السكة قَطْري

وياما قُلتوا إن الفشل مكتوب في سطري

مجاش في بالكُم أن أنا حـ أتحدى نفسي

وحـ يجي يوم فيه ربنا يُجْبُر بخاطري

جه يوم ارُد ومين يصُد الرد عنكُم

أنا ياما شوفت سيبوني أخلص تاري منكُم

أنا من البداية بقول يارب وربنا واقف معايا

وبرغم قسوة قلبُكُم زعلان عشانكُم

وماتتداروش كدا من الخجل لما تشوفوني

وبلاش عيونكم تتكسر قُدام عيوني

انتوا اللي كنتوا بتبعدوا وبتبعدوني

دلوقتي في اللي بردده بتقلدوني

وصِلت لكن بعد توهَه فــ سكة ضلمَة

قابلت فيها ناس ماليها الحقد ظالمة

على الشوك مشيت ولا يوم لقيت غير بس رحمة ربنا ودُعاكي يامَّه

أنا اللي خد مني التعب عمري اللي فات

أنا كنت دايمًا على الوجع بصحى وأبات

قصة حياتي حـ تتحكى بكل اللغات

بس اللي ترجم قصتي من حُزنُه مات

 

شكرًا قوي

سامي النويهي

 

الوسوم

موضوعات متعلقة

اترك رد

زر الذهاب إلى الأعلى
إغلاق
إغلاق

أنت تستخدم إضافة Adblock

برجاء دعمنا عن طريق تعطيل إضافة Adblock